Rreth 150 persona protestuan në qytetin Helsingborg kundër takimit ministror të NATO, ndërsa policia suedeze arrestoi disa prej pjesëmarrësve.
Demonstrata u zhvillua në sheshin Gustav Adolf dhe u organizua nga grupi “Shpërndajeni NATO-n”, një rrjet i lidhur me lëvizjen autonome të majtë.
Sipas mediave suedeze, organizatorët nuk kishin kërkuar leje për zhvillimin e protestës. Shërbimi publik televiziv suedez raportoi gjithashtu se disa nga protestuesit ishin të maskuar gjatë tubimit.
Takimi i ministrave të Jashtëm të NATO-s po mbahet në Suedi mes tensioneve të shtuara ndërkombëtare dhe diskutimeve për forcimin e mbrojtjes së aleancës.
