Policia e Shtetit ka publikuar bilancin e punës për muajin prill, duke raportuar një aktivitet intensiv në luftën kundër kriminalitetit në të gjithë vendin.
Sipas të dhënave zyrtare, gjatë këtij muaji janë zhvilluar 90 operacione policore, të cilat kanë çuar në arrestimin e 571 personave. Një pjesë e rëndësishme e aksioneve, konkretisht 13 operacione, kanë pasur në fokus kapjen dhe ekstradimin e personave në kërkim ndërkombëtar.
Gjatë prillit janë zbardhur 14 ngjarje kriminale dhe janë parandaluar 17 të tjera, ndërsa janë sekuestruar 33 armë zjarri, si dhe materiale të rrezikshme si granata, silenciatorë dhe lëndë shpërthyese.
Në kuadër të luftës kundër narkotikëve, policia ka sekuestruar rreth 10 kilogramë kanabis, mbi 2000 fara kanabisi, 1.5 kilogramë kokainë dhe tableta MDMA, si dhe ka asgjësuar një numër të konsiderueshëm fidanësh narkotikë.
Paralelisht, strukturat për hetimin e krimeve ekonomiko-financiare kanë goditur 15 raste që lidhen me mashtrim kompjuterik, kontrabandë dhe falsifikim dokumentesh. Gjithashtu janë zhvilluar 13 operacione për zbardhjen e vjedhjeve dhe 12 aksione kundër shfrytëzimit për prostitucion.
Në fushën e rendit rrugor, Policia Rrugore ka arrestuar 304 drejtues mjetesh, nga të cilët 170 për drejtim në gjendje të dehur dhe 134 pa leje drejtimi. Po ashtu, janë vendosur 93 645 masa administrative ndaj shkelësve.
Ndërkohë, Policia Kufitare ka evidentuar 40 raste të kalimit të paligjshëm të kufirit, 5 raste me dokumente false dhe 13 raste të trafiqeve të paligjshme.
Autoritetet bëjnë me dije se kontrollet dhe hetimet do të vijojnë me intensitet, në bashkëpunim me partnerët, me qëllim rritjen e sigurisë dhe goditjen e çdo forme të kriminalitetit në vend.
