Zv.kryeministrja Belinda Balluku, e pezulluar nga detyra në kuadër të hetimeve për aferat korruptive, do të jetë objekt shqyrtimi në Gjykatën Kushtetuese më 4 dhjetor. Kryetarja e Shoqatës së Avokatëve Penalistë, Joana Qeleshi, gjatë një interviste në “Studio 24” shpjegoi hapat proceduralë që do të ndiqen dhe pritshmëritë mbi vendimmarrjen.
Sipas saj, rasti i pezullimit nga detyra përmes një mase sigurie është i pari në 35 vitet e pluralizmit, gjë që ka nxitur debat të fortë si në planin juridik, ashtu edhe në atë politik.
Qeleshi: Rasti kërkon interpretim të qartë
Juristja e cilësoi pozitive ndërhyrjen e Gjykatës Kushtetuese, duke theksuar nevojën për qartësimin e konfliktit kushtetues që ka lindur.
“Kemi të bëjmë me një situatë të re, që kërkon interpretim të qartë. Është pozitive që Kushtetuesja po e shqyrton zyrtarisht këtë konflikt,” – u shpreh Qeleshi.
Ajo theksoi se aktualisht vendimi për pezullimin nga detyra hyn te masat ndaluese të parashikuara në Kodin e Procedurës Penale, dhe se mungesa e një precedenti e bën këtë rast veçanërisht delikat.
Çfarë ndodh në Kushtetuese? Juristja shpjegon skenarin
Qeleshi bëri të ditur se çështja është dërguar fillimisht në Kolegj, një filtër paraprak me tre gjyqtarë që vendos nëse rasti do të kalojë për shqyrtim të plotë apo do të rrëzohet.
Procedura është kjo:
Kolegji i Gjyqtarëve (3 gjyqtarë)
- Nëse ka unanimitet, ata mund të vendosin:
- moskalimin e çështjes në seancë plenare
- ose kalimin e saj për shqyrtim të plotë
Nëse nuk ka unanimitet
Atëherë aktivizohet një fazë e dytë:
Mbledhja e gjyqtarëve (me shumicë votash)
Kjo trupë vendos nëse çështja do të kalojë apo jo për shqyrtim në seancë plenare.
Vetëm nëse çështja kalon në seancë plenare
Atëherë bëhet një vendim përfundimtar, i dhënë nga të gjithë (8 ose 9) gjyqtarët e Gjykatës Kushtetuese.
“Vendimi jepet vetëm nëse çështja kalon në seancë plenare. Vetëm atëherë mund të flasim për një përfundim juridik,” sqaroi Qeleshi.
Çështja e imunitetit dhe boshllëqet ligjore
Juristja kujtoi se ndryshimet kushtetuese të vitit 2016, të pasuara nga ato në Kodin e Procedurës Penale në 2017, kanë kufizuar imunitetin e deputetëve vetëm për masat e arrestit. Nuk ka parashikime për masa të tjera, përfshirë pezullimin nga detyra.
“I vetmi ndalim i shprehur është për personat e zgjedhur përmes sistemit elektoral. Duhet parë nëse ministri përfiton nga kjo mbrojtje,” – tha ajo.
Sipas Qeleshit, mungesa e një dispozite të qartë ka sjellë pikërisht nevojën që Kushtetuesja të ndërhyjë për të ofruar interpretimin e duhur.
