Ish-ministri i Drejtësisë, Petrit Vasili, ka reaguar ashpër ndaj mënyrës së trajtimit të zyrtarëve të lartë në seancat gjyqësore, duke akuzuar sistemin e drejtësisë për standarde të dyfishta.
Në një reagim në rrjetet sociale, Vasili kritikoi vendimin e Gjykata e Posaçme Kundër Korrupsionit dhe Krimit të Organizuar për lejimin e Ilir Beqaj që të qëndrojë në sallë pranë avokatit të tij, ndërsa ish-presidenti Ilir Meta, sipas tij, trajtohet ndryshe gjatë proceseve gjyqësore.
“Meta në kafaz, ndërsa Beqaj në sallë në krah të avokatit”, shkroi Vasili, duke e cilësuar situatën si “drejtësi rrugaçësh”.
Ai akuzoi gjyqtarët për zbatim selektiv të ligjit dhe deklaroi se sistemi gjyqësor po funksionon sipas interesave dhe urdhrave politike.
“Çfarë qeverisje ka ky palaço sistem gjyqësor, që ka një ligj dhe trajtim special mafioz për Ilir Metën dhe një ligj tjetër për të tjerët, ndërkohë që ligji është një i vetëm dhe i barabartë për të gjithë”, u shpreh Vasili.
Sipas ish-ministrit, drejtësia në vend është kthyer në “turpin dhe faqen më të zezë të Shqipërisë”, ndërsa sallat e gjyqit, sipas tij, po përdoren në mënyrë të diferencuar për persona të ndryshëm.
Deklaratat e Vasilit vijnë në një kohë kur proceset ndaj ish-zyrtarëve të lartë dhe figurave politike po mbeten në qendër të debatit publik dhe politik në vend.
