Sekretari amerikan i Mbrojtjes, Pete Hegseth, ka lëshuar një deklaratë të fortë lidhur me tensionet në rritje me Iran, duke e cilësuar situatën si një “betejë ekzistenciale” për sigurinë e Shteteve të Bashkuara.
Gjatë një dëshmie në Kongres, Hegseth theksoi se SHBA do të mbështesë fort aleatët që investojnë në mbrojtjen e tyre, ndërsa paralajmëroi pasoja për vendet që nuk përmbushin detyrimet në kuadër të sigurisë kolektive.
“Aleatët model që veprojnë do të kenë mbështetjen tonë të plotë. Ata që dështojnë do të përballen me pasoja”, deklaroi ai, duke përmendur vende si Izraeli, Polonia, Finlanda dhe shtetet baltike si shembuj pozitivë.
Në qendër të deklaratave ishte përshkallëzimi i konfliktit me Iranin, për të cilin Hegseth u shpreh se përbën kërcënimin kryesor aktual për SHBA.
“Jemi vetëm dy muaj në një konflikt që është ekzistencial për sigurinë e popullit amerikan. Irani nuk mund të ketë armë bërthamore,” theksoi ai.
Sipas tij, objektet bërthamore iraniane janë dëmtuar rëndë nga sulmet e SHBA dhe aleatëve, por Teherani vazhdon të ruajë ambicie bërthamore dhe kapacitete të konsiderueshme ushtarake, përfshirë mijëra raketa.
Hegseth mbrojti gjithashtu kërkesën e administratës së Donald Trump për një buxhet rekord mbrojtjeje prej 1.5 trilionë dollarësh për vitin 2027, duke argumentuar se kjo është e domosdoshme për të përballuar kërcënimet globale.
“Po rindërtojmë një ushtri të aftë për një mjedis kompleks dhe shumëdimensional kërcënimesh,” tha ai.
Në lidhje me strategjinë ndaj Iranit, ai theksoi se qëllimi i SHBA është të ushtrojë presion maksimal për ta detyruar Teheranin të rikthehet në tryezën e negociatave dhe të pranojë një marrëveshje të re bërthamore.
Deklaratat e tij vijnë në një moment tensionesh të larta në Lindjen e Mesme, ku zhvillimet e fundit kanë rritur shqetësimet për një përshkallëzim më të gjerë rajonal dhe ndikime në sigurinë globale.
