Deputeti i Partisë Demokratike në qarkun e Elbasanit, Tomor Alizoti, ka reaguar me tone të ashpra ndaj kryeministrit Edi Rama, pasi ky i fundit përmendi emrin e tij gjatë aktivitetit të organizuar për 35-vjetorin e Partisë Socialiste në Elbasan.
Përmes një postimi në rrjetet sociale, Alizoti akuzoi kreun e qeverisë për arrogancë politike dhe për identifikimin e fatit të tij me atë të vendit. Deputeti demokrat argumentoi se protestat dhe zhvillimet e fundit politike janë pasojë e mënyrës së qeverisjes së Ramës, duke i cilësuar ato si shprehje të pakënaqësisë qytetare ndaj pushtetit.
Sipas Alizotit, Shqipëria po kalon një moment të rëndësishëm politik, ndërsa qytetarët po manifestojnë kundërshtimin e tyre përmes protestave dhe reagimeve publike.
Në reagimin e tij, ai kritikoi ashpër kryeministrin, duke e akuzuar se po përpiqet ta paraqesë largimin e tij nga pushteti si një goditje ndaj vendit. Alizoti theksoi se fundi i një qeverisjeje nuk duhet të ngatërrohet me fatin e kombit dhe se, sipas tij, qytetarët po kërkojnë ndryshim.
Deputeti demokrat deklaroi gjithashtu se fundi i pushtetit aktual po afrohet dhe falënderoi protestuesit që, sipas tij, po kontribuojnë në këtë proces. Në fund të reagimit, ai iu referua edhe deklaratave të Ramës për mbiemrin e tij, duke theksuar se nuk dëshiron të zbresë në debate personale.
Reagimi i Alizotit vjen në një kohë tensionesh të forta politike, ndërsa përplasjet mes mazhorancës dhe opozitës vijojnë të dominojnë debatin publik në vend.
