Pas gati tre dekadash në arrati, është arrestuar në Greqi Kostandin Nishku, 59 vjeç, i dënuar me burgim të përjetshëm për vrasjen e një fëmije në Gramsh në vitin 1997. Arrestimi është kryer me qëllim ekstradimi drejt Shqipërisë, ku ai pritet të vuajë dënimin e formës së prerë.
Sipas autoriteteve, Nishku ishte shpallur në kërkim ndërkombëtar prej 29 vitesh dhe kishte arritur t’i fshihej drejtësisë duke jetuar me identitet të rremë. Ai përdorte emra të ndryshëm dhe kishte siguruar dokumente false, me të cilat kishte ndërtuar jetën në Greqi.
Ngjarja për të cilën është dënuar lidhet me një konflikt të rëndë hakmarrjeje. Në mars të vitit 1997, Nishku shkoi i armatosur në banesën e një familjeje në Gramsh, në kërkim të një personi me të cilin kishte hasmëri të mëparshme. Pasi nuk mori informacion mbi vendndodhjen e tij, ai kreu vrasjen e fëmijës së familjes, një akt që tronditi rëndë opinionin publik në atë kohë.
Autoritetet bëjnë me dije se identifikimi i tij u bë i mundur falë teknologjisë moderne të njohjes së fytyrës, përmes krahasimit të fotografive të vjetra me ato të dokumenteve të rreme të përdorura vite më vonë. Bashkëpunimi mes strukturave ndërkombëtare çoi në lokalizimin dhe arrestimin e tij në territorin grek.
Procedurat për ekstradimin e Nishkut drejt Shqipërisë janë në vijim. Me rikthimin e tij në vend, një nga ngjarjet më të rënda kriminale të viteve ’90 pritet të mbyllë përfundimisht kapitullin e drejtësisë së vonuar.
