Papa Leoni XIV ka miratuar një ndihmë emergjente prej 100 mijë eurosh për Venezuelën, pas tërmetit shkatërrues që goditi vendin dhe shkaktoi humbje të mëdha në njerëz dhe dëme të konsiderueshme materiale.
Lajmi u bë i ditur nga Vatikani, i cili sqaroi se fondi është vënë në dispozicion nga Zyra e Lëmoshës Apostolike, institucioni i Selisë së Shenjtë që koordinon veprat bamirëse të Papës dhe mbështet komunitetet e goditura nga fatkeqësi natyrore apo kriza humanitare.
Sipas Vatican News, ndihma prej 100 mijë eurosh përfaqëson një kontribut fillestar për të mbështetur operacionet e emergjencës dhe për të ndihmuar familjet e prekura nga katastrofa, ndërsa pritet që ndihma humanitare të vijojë edhe në ditët në vazhdim.
Venezuela u godit gjatë natës mes së mërkurës dhe të enjtes nga dy tërmete të fuqishme me magnitudë 7.2 dhe 7.5, të cilat, sipas bilancit paraprak të autoriteteve, kanë shkaktuar të paktën 164 viktima dhe qindra të plagosur.
Operacionet e kërkim-shpëtimit vijojnë në zonat më të goditura, ndërsa ekipet e emergjencës po punojnë për të nxjerrë të mbijetuarit nga rrënojat dhe për të ofruar ndihmë për mijëra persona të mbetur pa strehë.
Përveç Selisë së Shenjtë, ndihmë për Venezuelën kanë njoftuar edhe disa shtete dhe organizata ndërkombëtare, përfshirë Shtetet e Bashkuara, Bashkimin Evropian, Kubën dhe Iranin, të cilët kanë ofruar mbështetje humanitare dhe ekipe të specializuara për operacionet e shpëtimit.
Katastrofa ka rënduar më tej situatën në Venezuelë, një vend që prej vitesh përballet me vështirësi ekonomike dhe sociale, duke e bërë edhe më sfiduese përballimin e pasojave të kësaj fatkeqësie natyrore.
