Pas zjarrit të fuqishëm që përfshiu pallatin në kompleksin “Arlis” pranë zonës së njohur si “Farmacia 10” në Tiranë, autoritetet kanë nisur zyrtarisht verifikimet për të përcaktuar shkaqet e ngjarjes.
Një grup pune i përbërë nga përfaqësues të Inspektoratit Shtetëror Teknik dhe Industrial si dhe Inspektoratit Kombëtar të Mbrojtjes së Territorit ka zbritur në terren për të kryer inspektime të menjëhershme.
Fokusi i kontrollit do të jetë te subjektet private që operojnë në ndërtesë, me qëllim identifikimin e çdo shkeljeje të mundshme që mund të ketë ndikuar në shpërthimin dhe përhapjen e flakëve.
Grupi i ekspertëve pritet të mbikëqyrë nga afër situatën dhe të hartojë një raport të detajuar mbi konstatimet, i cili do të shërbejë si bazë për hapat e mëtejshëm ligjorë dhe administrativë.
Zjarri që përfshiu kompleksin shkaktoi dëme të konsiderueshme materiale dhe vuri në rrezik jetën e banorëve, duke ngritur shqetësime serioze mbi standardet e sigurisë në ndërtime dhe nevojën për kontrolle më të rrepta institucionale.
