Serie A vijon të jetë kampionati ku aktivizohet pjesa më e madhe e lojtarëve kryesorë të Kombëtares shqiptare, por jo të gjithë po përjetojnë një moment pozitiv. Mes tyre është edhe Kristjan Asllani, i cili po kalon një periudhë të vështirë me skuadrën e Torinos.
Skuadra granata u mposht në javën e 17-të të kampionatit, pavarësisht se kaloi e para në avantazh ndaj Cagliarit. Humbja ka rënduar më tej situatën e Torinos në renditje dhe ka sjellë një valë kritikash nga mediat sportive italiane, të cilat nuk kanë kursyer as lojtarët kryesorë.
Në qendër të kritikave ishte edhe mesfushori shqiptar Kristjan Asllani. Mediat e vlerësuan paraqitjen e tij me notë të ulët, duke theksuar mungesën e pasimeve vertikale, ritmin e dobët dhe vështirësitë në fazën mbrojtëse. Sipas analizave, Asllani është shumë larg nivelit që kishte treguar më herët, kur konsiderohej një nga mesfushorët më premtues të kampionatit italian.
Situata kontraston me rolin e tij te Kombëtarja shqiptare, ku Asllani mbetet një titullar i padiskutueshëm nën drejtimin e trajnerit Sylvinho, pavarësisht konkurrencës në rritje në mesfushë. Që nga viti 2023, 23-vjeçari ka zhvilluar mbi 30 ndeshje me fanellën kuqezi.
Pushimi i fundvitit shihet si një mundësi e mirë për Asllanin që të rikuperojë formën dhe besimin, pasi Torino ka nevojë urgjente për një mesfushë më funksionale dhe për një lider që të marrë përgjegjësi në momentet e vështira.
