Një incident alarmues ndodhi më 9 gusht 2025, kur Policia e Shtetit ndërhyri në godinën e televizionit “News24” pa vendim gjykate, pa dokumentacion ligjor dhe pa ndjekur ndonjë procedurë zyrtare. Gazetarë u nxorën jashtë ndërtesës, ndërsa prona u dorëzua në mënyrë të përshpejtuar një firme private – KAYO – që drejtohej nga ish-drejtori i Policisë, Ardi Veliu. Godina ishte marrë nga “Fokus Media Group” me akt noterial dhe inventar të plotë, para se të përdorej në këtë operacion.
Situata u rëndua kur një kamion me targë të falsifikuar hyri në oborrin e televizionit, dhe punonjës të Policisë Ushtarake, që kishin hequr shenjën e identifikimit nga uniformat, krijuan një kordon sigurie për ta mbrojtur. Kamioni transportoi tavolina, karrige, dosje hetimore dhe sende personale të gazetarëve deri në Durrës, si mall pa zot.
Ngjarja shënon një moment kur institucionet që ishin krijuar për të garantuar ligjin u transformuan në shkelës të tij. Deri dhe ushtria – struktura simbol e standardeve perëndimore – u përdor për të kontrolluar një media civile, duke ulur besueshmërinë dhe cilësinë e shtetit ligjor në Shqipëri.
