Kryeministri Edi Rama ka deklaruar në mbledhjen e përbashkët të dy Kuvendeve të Kosovës dhe Shqipërisë në Prishtinë, se në vitin 2027 do të mbyllim negociatat për integrimin në Bashkimin Europian.
Ai ka theksuar se Shqipëria tani është , epiqendra e momenteve historike europiane, ndërkohë dikur konsiderohej ‘delja e zezë’ nga të gjithë.
Sakaq, Rama ka shtuar se më 16 maj do të mbahet Samiti i Komunitetit Europian në Tiranë, ku do jenë pjesëmarrës lidera nga e gjitha bota.
“Një event botëror që mbledh me mijëra njerëz. Përshtypjet e misionit ishin të jashtëzakonshme për ç’ka është ndërtuar në këto 10 vite. Presim që në Samitin e Hagës, Shqipëria të shpallet zyrtarisht vend europian në 2027. Pasi do të jetë një vit që do të mbyllim negociatat. Para 10 viteve, kjo ishte një majë që nuk shihej as me dylbi. Nuk jemi më figurantë në fotografitë familjare të bashkësisë ndërkombëtare, por kemi një rol të rëndësishëm e përcaktues për rajonin tonë, i cili sot më shumë se kurrë ka një domethënie të posaçme për Europën e nesërme.
Ndërsa, vitin e ardhshëm më 16 maj do të mbahet Samiti i Komunitetit Europian në Shqipëri, ku do të presim liderat tanë nga Londra në Ankara dhe deri në Baku. Kështu Shqipëria do të jetë përsëri epiqendra e momenteve historike europiane, ndërsa dikur konsiderohej delja e zezë. Tani më nuk jemi thjesht anëtarët e dikurshëm, por kemi peshë përcaktuese për rajonin tonë”, tha ndër të tjera Rama.
