Kryeministri izraelit Benjamin Netanyahu ka deklaruar se Izraeli do të vazhdojë luftën kundër Iranit pa ndërprerje dhe pa kompromis, duke paralajmëruar një fazë të re të konfliktit me zhvillime të tjera ushtarake.
Gjatë një fjalimi publik, Netanyahu tha se Izraeli ka një plan të mirëorganizuar për fazën e ardhshme të operacioneve dhe se do të ketë edhe “shumë surpriza” në vijim të luftës.
Sipas tij, qëllimi i Izraelit nuk është ndarja e Iranit, por dobësimi i regjimit dhe krijimi i kushteve për ndryshim.
“Ne nuk po përpiqemi ta ndajmë Iranin. Ne po përpiqemi ta çlirojmë Iranin”, u shpreh kryeministri izraelit.
Netanyahu theksoi gjithashtu se Izraeli qëndron në krah të vendeve të tjera që janë goditur nga sulmet iraniane në rajon.
Në deklaratën e tij ai i dërgoi edhe një paralajmërim qeverisë së Libanit, duke kërkuar zbatimin e marrëveshjes së armëpushimit të vitit 2024 dhe çarmatimin e Hezbollahut.
“Është përgjegjësia juaj të zbatoni marrëveshjen e armëpushimit të vitit 2024. Është përgjegjësia juaj të çarmatosni Hezbollahun”, tha Netanyahu.
Ai paralajmëroi se nëse qeveria libaneze nuk vepron, sulmet e Hezbollahut mund të sjellin pasoja të rënda për Libanin.
Në përfundim të fjalës së tij, kryeministri izraelit theksoi se Izraeli do të bëjë gjithçka që është e nevojshme për të mbrojtur qytetet dhe qytetarët e tij.
