Partia Socialiste e Shqipërisë ka propozuar ndryshime në ligjin për Gardën e Republikës, duke rikthyer formulën e mëparshme të emërimit të drejtuesit nga Kryeministri, në vend të përzgjedhjes përmes një konkursi të hapur.
Projektligji i ri, i propozuar nga deputetja Antoneta Dhima, parashikon që Drejtori i Përgjithshëm i Gardës të emërohet nga Kryeministri, pas një propozimi nga ministri përkatës, dhe të marrë menjëherë gradën “Drejtues Madhor”.
Ky ndryshim vjen pas një periudhe të paqëndrueshme në drejtimin e institucionit, pasi ish-drejtuesi Ermal Onuzi dha dorëheqjen vetëm 9 muaj pas emërimit, ndërsa tentativa për një garë të hapur për pasuesin e tij dështoi pa shpjegime zyrtare.
Ndryshimet e reja synojnë, sipas propozuesve, përmirësimin e qartësisë ligjore dhe shmangien e keqinterpretimeve. Megjithatë, ato shoqërohen edhe me lehtësim të disa kritereve për kandidatët.
Konkretisht, hiqet kërkesa për diplomë master dhe për të paktën 10 vite përvojë pune në fushën e sigurisë, ndërsa kriteri për masat disiplinore ndryshohet duke kërkuar që kandidati të mos ketë pasur masa në tre vitet e fundit.
Gjithashtu, përcaktohet që kandidati për drejtues të vijë nga radhët e vetë Gardës së Republikës.
Ndryshimet pritet të rikthejnë debatin politik mbi mënyrën e emërimeve në institucionet e sigurisë dhe balancën mes profesionalizmit dhe ndikimit politik në këto struktura.
