Një zyrtar i lartë i NATO-s ka deklaruar se Rusia ka të ngjarë të reagojë ndaj transferimit të raketave amerikane Tomahawk për Ukrainën jo duke zhvilluar armë të reja, por përmes kërcënimeve të ashpra dhe sulmeve të mëdha ndaj qyteteve ukrainase.
Deklarata u bë përpara takimit të ministrave të Mbrojtjes të aleancës në Bruksel.
“Do të vazhdojmë të shohim retorikë të papërgjegjshme – kërcënime bërthamore dhe presione verbale. Mund të ketë gjithashtu eskalime përgjatë vijës së frontit dhe sulme ndëshkuese në shkallë të madhe. Por Rusia nuk do të jetë në gjendje të bëjë diçka të paparashikueshme”, tha zyrtari i NATO-s.
Sipas tij, raketat Tomahawk nuk pritet të ndryshojnë balancën e forcave, por do të forcojnë kapacitetet ekzistuese të Ukrainës për sulme me rreze të gjatë. Ai shtoi se Ukraina tashmë përdor me sukses raketat e veta dhe dronët me rreze të gjatë.
Efekti i dërgesave të reja do të varet nga numri i raketave të dorëzuara dhe objektivat që do të zgjedhin Forcat e Armatosura të Ukrainës.
Nga ana e tij, presidenti rus Vladimir Putin e quajti transferimin e Tomahawk-ëve “një fazë të re cilësore të eskalimit”, ndërsa presidenti amerikan Donald Trump deklaroi se ka për qëllim të diskutojë personalisht me Putinin nëse Moska dëshiron që ato raketa të fluturojnë drejt saj.
