Kryeministri i Maqedonia e Veriut, Hristijan Mickoski, ka paralajmëruar një riformatim të kabinetit qeveritar, vetëm një ditë pas dorëheqjes së zëvendëskryeministrit Arben Fetai.
Në një deklaratë për mediat, Mickoski tha se aktualisht është i fokusuar në proceset e brendshme të partisë dhe në ristrukturimin organizativ, ndërsa vendimet për ndryshimet në qeveri pritet të diskutohen me partnerët e koalicionit pas mesit të muajit qershor.
“Tani jam i përkushtuar ndaj ndryshimeve të brendshme partiake dhe ristrukturimit. Planifikojmë ta përfundojmë këtë deri në mesin e qershorit dhe më pas, në gjysmën e dytë të muajit, do të ulemi me partnerët qeveritarë për të diskutuar se si do të vazhdojmë”, deklaroi ai.
Kryeministri nuk konfirmoi nëse largimi i Fetait do të jetë ndryshimi i vetëm në kabinet, duke lënë të hapur mundësinë e një rikonfigurimi më të gjerë të ekzekutivit.
Dorëheqja e Arben Fetait, i cili mbante postin e zëvendëskryeministrit për qeverisje të mirë, u bë publike më 1 qershor përmes një letre ku ai deklaroi se largohej nga detyra “me kokën lart dhe me ndërgjegje të pastër”.
Largimi i tij vjen pas një periudhe të gjatë mungese nga aktivitetet publike institucionale. Sipas mediave në Maqedoninë e Veriut, paraqitjet e fundit publike të Fetait në cilësinë e zëvendëskryeministrit datojnë që nga muaji mars, ndërsa ai mungoi edhe në seancën parlamentare të pyetjeve të deputetëve më 18 maj.
Deklaratat e Mickoskit kanë nxitur spekulime për një rishikim të balancave brenda koalicionit qeverisës dhe për mundësinë e emërimeve të reja në poste kyçe të qeverisë gjatë javëve të ardhshme.
