Avokati i kryetarit të Partisë së Lirisë, Ilir Meta, ka depozituar një kërkesë zyrtare në Gjykatën e Posaçme (GJKKO), duke pretenduar se ish-presidentit po i shkelen të drejtat kushtetuese përmes vendosjes së tij në një kabinë xhami apo kafaz metalik gjatë seancave gjyqësore.
Në kërkesë, avokati Kujtim Cakrani argumenton se mënyra e paraqitjes së Metës në sallë përbën një trajtim degradues, të ndaluar nga Kushtetuta dhe Konventa Evropiane e të Drejtave të Njeriut, duke cenuar parimin e prezumimit të pafajësisë dhe të drejtën për mbrojtje efektive.
Mbrojtja: “Izolimi krijon perceptimin e fajësisë së paracaktuar”
Sipas avokatit, izolimi fizik dhe vizual i Metës në kabinë xhami:
- e stigmatizon atë para trupit gjykues dhe opinionit publik,
- krijon përshtypjen e rrezikshmërisë,
- sugjeron “fajësi të paracaktuar”,
- pengon komunikimin e lirë dhe konfidencial me avokatin,
- e trajton “si objekt sigurie dhe jo si subjekt të së drejtës”.
Mbrojtja i referohet edhe jurisprudencës së Gjykatës Evropiane të të Drejtave të Njeriut, e cila në çështjen historike Svinarenko & Slyadnev kundër Rusisë (2014) e ka cilësuar vendosjen e të pandehurve në kafaz metalik si trajtim çnjerëzor dhe poshtërues.
Pretendimet ligjore: Shkelje e Kushtetutës dhe KEDNJ
Në kërkesën voluminoze, avokat Cakrani thotë se vendosja e Metës në kabinë të mbyllur cenon:
- Nenin 3 të KEDNJ – ndalim absolut i trajtimit çnjerëzor dhe poshtërues
- Nenin 30 të Kushtetutës – prezumimi i pafajësisë
- Nenin 31 të Kushtetutës dhe nenin 6 të KEDNJ – e drejta për mbrojtje efektive
- Dinjitetin njerëzor, të sanksionuar si parim themelor kushtetues
Mbrojtja argumenton se komisionet ndërkombëtare, përfshirë CPT, kanë kërkuar heqjen e plotë të kabinave të xhamit dhe kafazeve në sallat e gjyqit në Europë.
Meta: “Nuk zhvillojmë seancë derisa të hiqet trajtimi poshtërues”
Në përfundim, mbrojtja kërkon:
- shqyrtimin dhe konstatimin e shkeljeve kushtetuese,
- heqjen e menjëhershme të çdo forme izolimi fizik në sallë,
- uljen e Metës pranë avokatit, pa barriera,
- urdhrimin e administratës së gjykatës dhe forcave të sigurisë për respektimin e standardeve evropiane të procesit gjyqësor.
“Deri sa të merren masat për heqjen e shkeljes së dinjitetit njerëzor, ne nuk do të zhvillojmë seanca gjyqësore,” – thuhet në kërkesë.
Mbrojtja pret që gjykata të marrë masa “për rikthimin e normalitetit” dhe zhvillimin e gjykimit sipas standardeve të prezumimit të pafajësisë.
