Aktori i njohur Mehdi Malkaj iu bashkua edhe protestës së dhjetë qytetare të zhvilluar në kryeqytet, duke bërë thirrje për unitet dhe angazhim në mbrojtje të interesave kombëtare.
Gjatë fjalës së tij para protestuesve, Malkaj u shpreh se shqiptarët kanë përgjegjësinë të ruajnë dhe mbrojnë vendin e tyre nga çdo zhvillim që, sipas tij, cenon interesin publik dhe të ardhmen e Shqipërisë.
“Kanë tentuar ta copëtojnë Shqipërinë dhe ta dëmtojnë në shumë mënyra. Është detyra jonë ta mbrojmë vendin tonë dhe të mos lejojmë që interesat e qytetarëve të anashkalohen”, deklaroi aktori.
Malkaj theksoi rëndësinë e bashkimit qytetar përballë sfidave që përballet vendi, duke i ftuar protestuesit të vijojnë të qëndrojnë të bashkuar dhe të angazhuar në kauzat që i konsiderojnë të drejta.
Në fjalën e tij, ai iu drejtua edhe shqiptarëve jashtë kufijve të Shqipërisë, duke përmendur veçanërisht Kosovën, për të cilën tha se ka dhënë kontribute dhe sakrifica të mëdha në historinë kombëtare.
“I bëj thirrje edhe vëllezërve tanë në Kosovë dhe kudo ku jetojnë shqiptarët që të mbështesin vlerat kombëtare dhe të ardhmen e përbashkët të shqiptarëve”, u shpreh ai.
Protesta në Tiranë ka hyrë në ditën e saj të dhjetë dhe ka mbledhur qytetarë, aktivistë, artistë dhe përfaqësues të ndryshëm të shoqërisë civile, të cilët kanë artikuluar kërkesa që lidhen me qeverisjen, mbrojtjen e mjedisit dhe zhvillimin e vendit.
Organizatorët kanë njoftuar se mobilizimi qytetar do të vijojë edhe në ditët në vijim.
