Komisioni Europian ka përsëritur nevojën që Shqipëria të garantojë përputhshmërinë e projekteve të zhvillimit në zonat e mbrojtura me standardet dhe legjislacionin mjedisor të Bashkimit Europian, duke e konsideruar këtë një element të rëndësishëm të procesit të integrimit.
Deklarata vjen në një moment kur debati publik është përqendruar te projekti turistik i planifikuar në zonën e Zvërnecit, i cili ka shkaktuar reagime dhe protesta nga grupe qytetarësh dhe organizata mjedisore.
Zëdhënësi i Komisionit Europian, Guillaume Mercier, deklaroi se autoritetet shqiptare duhet të tregojnë kujdes në zbatimin e detyrimeve që rrjedhin nga procesi i anëtarësimit dhe të shmangin çdo veprim që mund të ndikojë negativisht në përmbushjen e kritereve të përcaktuara nga Bashkimi Europian.
“Shqipëria duhet të shmangë veprimet që mund të cenojnë përmbushjen e kritereve të nevojshme për mbylljen e kapitujve negociues dhe presim që autoritetet të veprojnë pa vonesë”, u shpreh Mercier.
Sipas Komisionit Europian, mbrojtja e mjedisit dhe respektimi i legjislacionit për habitatet natyrore përbëjnë pjesë të rëndësishme të Kapitullit 27 të negociatave, i cili trajton çështjet e mjedisit dhe ndryshimeve klimatike.
Debati është përqendruar te investimi i propozuar në zonën e bregdetit të Zvërnecit, ku parashikohet zhvillimi i një resorti turistik. Projekti është lidhur me kompaninë Affinity Partners, e themeluar nga Jared Kushner, dhëndri i presidentit amerikan Donald Trump.
Nga ana e tij, kryeministri Edi Rama ka deklaruar se Shqipëria mbetet e angazhuar për mbrojtjen e mjedisit dhe se çdo zhvillim i mundshëm do t’i nënshtrohet procedurave ligjore dhe vlerësimeve përkatëse të ndikimit në mjedis.
“Komisioni Europian nuk ka arsye të dyshojë në vullnetin tonë për të mbrojtur natyrën dhe biodiversitetin e vendit”, është shprehur Rama.
Ndërkohë, Komisioni Europian ka bërë të ditur se vijon komunikimin me autoritetet shqiptare për këtë çështje, duke theksuar rëndësinë e transparencës, konsultimit publik dhe respektimit të standardeve mjedisore europiane në çdo projekt zhvillimor që prek zonat e mbrojtura.
Shqipëria aktualisht ndodhet në procesin e negociatave për anëtarësim në Bashkimin Europian, ndërsa përafrimi me legjislacionin e BE-së në fushën e mjedisit konsiderohet një nga kushtet kryesore për avancimin e mëtejshëm të procesit.
