Ish-kryeministri i Rusisë dhe aktualisht zëvendëskëshilltar për sigurinë i presidentit Vladimir Putin, Dmitri Medvedev, ka komentuar zhvillimet e fundit në Venezuelë, duke i cilësuar veprimet e presidentit amerikan Donald Trump si “të paligjshme, por të qëndrueshme”.
Në një deklaratë për mediat ruse, Medvedev tha se ndërhyrja amerikane përbën një shkelje të hapur të së drejtës ndërkombëtare, por sipas tij, ajo tregon një koherencë politike, pasi Trump po vepron në funksion të mbrojtjes së interesave kombëtare të Shteteve të Bashkuara.
“Pavarësisht sjelljes haptazi të paligjshme, duhet pranuar se veprimet e Trump janë të qëndrueshme. Ai dhe ekipi i tij po mbrojnë interesat e vendit të tyre me ashpërsi”, u shpreh Medvedev.
Ai theksoi se Amerika Latine historikisht është konsideruar nga Uashingtoni si zonë e ndikimit të tij dhe se Venezuela, për shkak të rezervave të mëdha të naftës, mbetet një objektiv strategjik për SHBA-në. Sipas Medvedev, veprimet e administratës amerikane lidhen drejtpërdrejt me kontrollin e burimeve energjetike dhe ndikimin gjeopolitik në rajon.
Politikani rus paralajmëroi gjithashtu se nëse një ndërhyrje e tillë do të ndodhte ndaj një shteti më të fuqishëm ushtarakisht, ajo do të interpretohej pa dyshim si akt lufte dhe do të sillte pasoja të rënda ndërkombëtare.
Deklaratat e Medvedev vijnë në një moment tensionesh të shtuara globale, ndërsa zhvillimet në Venezuelë po shkaktojnë reagime të forta dhe debate mbi kufijtë e ndërhyrjes dhe respektimin e sovranitetit shtetëror.
