Organizatorët e protestave kanë njoftuar se mbrëmjen e sotme do të zhvillohet protesta e 31-të radhazi kundër qeverisë, duke u bërë thirrje qytetarëve nga i gjithë vendi dhe diasporës shqiptare t’i bashkohen tubimit në Tiranë.
Sipas njoftimit, grumbullimi i pjesëmarrësve do të nisë në orën 19:00 në Sheshin “Skënderbej”, ndërsa më pas protestuesit do të marshojnë drejt godinës së Kryeministrisë, ku pritet të zhvillohet pjesa kryesore e tubimit.
Organizatorët kanë deklaruar se kërkesa kryesore e protestës mbetet dorëheqja e kryeministrit Edi Rama, duke theksuar se mobilizimi do të vazhdojë edhe në ditët në vijim.
Ata u kanë bërë thirrje qytetarëve të marrin pjesë në mënyrë masive në protestën e mbrëmjes, e cila shënon ditën e 31-të të tubimeve të njëpasnjëshme të zhvilluara në kryeqytet.
