Policia e Tiranës ka finalizuar operacionin e koduar “Lockdown”, pas një hetimi dy-mujor të zhvilluar me metoda proaktive nga Komisariati i Policisë Nr. 3, në bashkëpunim me Prokurorinë pranë Gjykatës së Shkallës së Parë Tiranë.
Si rezultat i operacionit janë arrestuar katër persona, të dyshuar për trafikim dhe shitje armësh zjarri, të cilat sipas hetimeve ishin siguruar nga Kosova dhe më pas magazinuar në zonën e Selitës në Tiranë.
Në pranga kanë rënë:
- Gloris Nezaj, 39 vjeç
- Rezarto Rumi, 48 vjeç
- Kelvin Caushi, 49 vjeç
- Ardjan Caushi, 45 vjeç
Gjatë kontrolleve të ushtruara në banesa dhe ambiente të përdorura nga grupi, policia ka sekuestruar:
- 8 armë zjarri (5 pistoleta dhe 3 automatikë)
- pjesë të ndryshme armësh
- një armë gjahu
- krehra dhe municion luftarak
- 3 radio komunikimi të ngjashme me ato të policisë
- një jelek multifunksional
- 9 telefona celularë
Sipas hetimeve paraprake, grupi dyshohet se kishte krijuar një strukturë të organizuar, ku armët modifikoheshin, magazinoheshin dhe më pas shiteshin në Tiranë.
Nën drejtimin e Prokurorisë, policia po vijon hetimet për identifikimin dhe kapjen e personave të tjerë të përfshirë në këtë aktivitet kriminal. Materialet procedurale janë referuar për veprime të mëtejshme ligjore.
