Lufta në Ukraina dhe mobilizimi ushtarak në Rusia po krijojnë mungesë të thellë të fuqisë punëtore, duke detyruar të dy vendet të importojnë punëtorë nga Azia dhe Afrika për të mbajtur në funksion fabrikat dhe sektorët kritikë të ekonomisë.
Në qytetin ukrainas Ivano-Frankivsk, një kompani ndërtimi njoftoi banorët e një kompleksi se territori do të pastrohej nga punëtorë emigrantë nga India, të cilët ishin angazhuar për shkak të mungesës kritike të fuqisë punëtore.
Raste të ngjashme po shfaqen në mbarë Ukrainën. Në rajonin Zakarpatia, një fabrikë përpunimi druri ka punësuar 150 punëtorë nga Bangladeshi, ndërsa në Çerkasi pritet që shtetas të huaj të angazhohen në projekte infrastrukturore.
Ekspertët e migracionit thonë se rreth 30% e vendeve të punës në Ukrainë mbeten bosh, ndërsa miliona qytetarë janë larguar nga vendi që prej nisjes së pushtimit rus në vitin 2022. Situata është rënduar edhe nga mobilizimi ushtarak dhe ligjet e reja që lejojnë të rinjtë të largohen nga vendi.
Ndërkohë, edhe Rusia po përballet me mungesë të madhe punëtorësh. Sipas mediave lokale, në vitin 2025 janë lëshuar mbi 56 mijë leje pune për shtetas indianë dhe mijëra të tjera për punëtorë nga Bangladeshi.
Punëtorët nga Azia Qendrore, që tradicionalisht mbushnin tregun rus të punës, po e shmangin gjithnjë e më shumë Rusinë për shkak të frikës se mund të rekrutohen për luftën në Ukrainë.
Ekspertët thonë se shumë indianë po e shohin Rusinë si alternativë ekonomike, pasi kufizimet e emigracionit në Perëndim dhe tensionet në Lindjen e Mesme kanë ngushtuar mundësitë për punë jashtë vendit.
Megjithatë, shqetësimet mbeten të mëdha. Në Indi janë raportuar raste kur persona të rekrutuar fillimisht për punë civile në Rusi kanë përfunduar në vijën e frontit në Ukrainë.
Në Ukrainë, debati për emigrantët po bëhet gjithnjë e më i fortë. Analistët paralajmërojnë se vendi mund të përballet me ndryshime të mëdha demografike nëse mungesa e fuqisë punëtore vazhdon.
Sipas ekonomistit ukrainas Timofiy Mylovanov, Ukraina rrezikon të importojë “jo dhjetëra mijëra, por miliona” punëtorë në të ardhmen, nëse nuk investon në arsimim, teknologji dhe automatizim të ekonomisë.
