Gjykata Kushtetuese ka shtyrë edhe një herë seancën për shqyrtimin e ankimimit të qeverisë lidhur me pezullimin nga detyra të zv.kryeministres dhe ministres së Infrastrukturës Belinda Balluku, një masë e vendosur nga Gjykata e Posaçme kundër Korrupsionit. Seanca që ishte planifikuar të mbahej më 4 dhjetor, do të zhvillohet tani më 12 dhjetor 2025.
Sipas njoftimit zyrtar, shtyrja është bërë për shkak të:
- kompleksitetit të çështjes,
- volumit të lartë të materialeve shoqëruese,
- agjendës së ngarkuar të gjykatës,
- dhe kërkesës së disa prej anëtarëve të saj.
Gjykata njofton se vendimmarrja e Mbledhjes së Gjyqtarëve do të komunikohet në faqen zyrtare pas mbledhjes së 12 dhjetorit.
Pezullimi i Ballukut dhe efekti politik
Belinda Balluku u pezullua nga detyra, i’u bllokua pasaporta dhe iu ndalua dalja jashtë vendit, pasi SPAK e mori të pandehur për akuzën e shkeljes së barazisë në tendera, në dy procedura publike me vlerë totale mbi 210 milionë euro.
Kryeministri Edi Rama e ka quajtur pezullimin “precedent të rrezikshëm” dhe ka intensifikuar presionin publik që Gjykata Kushtetuese të pranojë ankesën e qeverisë, duke argumentuar se vendimi pengon funksionimin e ekzekutivit.
“Nëse pezullimi i një ministri legjitimohet, do të krijohet një precedent i panjohur në Europë, që rrezikon balancat institucionale dhe stabilitetin politik,” – tha Rama më herët në një video-mesazh.
Ai shtoi se vendimi ka bllokuar 36 akte të ministres, përfshirë 18 akte të rindërtimit, dhe madje ka pezulluar ecurinë e marrëveshjes dypalëshe për fluturimet transatlantike me Kanadanë.
Akuzat e SPAK: Paracaktim fituesish në dy tendera të mëdhenj
SPAK akuzon Ballukun se ka ndërhyrë dhe drejtuar personalisht procedurat e:
1. Tenderit për Tunelin e Llogarasë
- Fond limit: 18.9 miliardë lekë
- Sipas prokurorisë, fituesi është paracaktuar përmes privilegjeve të padrejta në bashkëpunim me zyrtarë të Autoritetit Rrugor Shqiptar dhe anëtarë të KVO-së.
2. Tenderit për Lotin 4 të Unazës së Jashtme Tiranë (2021)
- Fond limit: 2 miliardë lekë
- SPAK thotë se edhe në këtë rast është ndjekur një procedurë e paracaktuar në favor të operatorëve fitues.
Të pandehur të tjerë përfshihen ish-drejtorët e ARRSH-së dhe specialistë të ministrisë.
