Sali Berisha ka reaguar ndaj thirrjeve të kryeministrit Edi Rama për investime nga diaspora, duke deklaruar se realiteti ekonomik në vend është ndryshe nga ai që paraqitet nga qeveria.
Në një dalje për mediat, Berisha u shpreh se investimet e huaja në Shqipëri janë në rënie, ndërsa një pjesë e konsiderueshme e kapitalit që hyn në vend, sipas tij, nuk përfaqëson investime reale produktive.
Ai theksoi se një pjesë e madhe e këtyre fondeve po përdoret për blerje pronash, duke përmendur fenomenin e kullave të reja në Tiranë, të cilat sipas tij mbeten të pabanuara.
“Shikoni kullat, të gjitha katet pa drita. Janë krijuar ‘lugetërit pa drita’ në Tiranë. Çfarë janë këta? Monumente të krimit,” u shpreh Berisha, duke pretenduar se një pjesë e tyre janë blerë nga grupe kriminale.
Megjithatë, ai shtoi se ka edhe qytetarë të ndershëm që kanë investuar në prona, por sipas tij, këto blerje nuk krijojnë punësim apo zhvillim ekonomik të qëndrueshëm.
Në vijim, Berisha kritikoi edhe nismat e qeverisë për zhvillimin e zonave malore, duke e cilësuar “paketën e maleve” si një iniciativë që, sipas tij, favorizon interesa të caktuara.
“Paketa e maleve është paketa e mafies,” deklaroi ai, duke u bërë thirrje qytetarëve të mos bien pre e asaj që e cilësoi si propagandë për investimet.
Deklaratat e tij vijnë në një kohë kur qeveria ka intensifikuar thirrjet ndaj diasporës për të investuar në Shqipëri, veçanërisht në sektorin e turizmit dhe zhvillimit të pasurive të paluajtshme.
