Situata e transportit publik në Shqipëri po përkeqësohet, me reduktimin e numrit të autobusëve që ka arritur deri në 60% në disa qytete të vendit.
Sipas kryetarit të Shoqatës së Transportit Urban dhe Interurban, Dashnor Memaj, reduktimi është i ndjeshëm në disa rrethe kryesore: në Durrës rreth 50%, në Vlorë dhe Berat deri në 60%, në Lushnjë 50% dhe në Peshkopi rreth 40%.
Edhe transporti ndërqytetas me furgonë po funksionon me orare të reduktuara, ndërsa sektori përballet prej kohësh me vështirësi financiare, të thelluara nga rënia e numrit të pasagjerëve pas pandemisë së COVID-19.
Memaj theksoi se rritja e çmimit të naftës ka rënduar më tej situatën, duke paralajmëruar se operatorët janë pranë pezullimit të shërbimit në mungesë të mbështetjes nga shteti.
Në Tiranë, nga rreth 200 autobusë që operojnë në afro 50 linja, kanë dalë në qarkullim vetëm 115, duke shkaktuar pritje të gjata dhe radhë në stacione.
Shoqatat e transportit kanë kërkuar nga qeveria rikthimin e skemës së kompensimit të naftës, të ngjashme me atë të vitit 2022, por deri tani nuk ka pasur reagim konkret nga institucionet.
Në këto kushte, operatorët paralajmërojnë se pa ndërhyrje urgjente, shërbimi i transportit publik mund të pezullohet, duke krijuar pasoja serioze për lëvizjen dhe jetën ekonomike në të gjithë vendin.
