Kur flet një legjendë e futbollit si Aleks Ferguson, vëmendja është e garantuar. Ish-trajneri historik ka ndarë kujtime nga marrëdhënia e tij me Kristiano Ronaldon, një nga lojtarët më të mëdhenj që ka drejtuar gjatë karrierës së tij.
Ferguson tregon se i besoi Ronaldos që në adoleshencë, pas një vëzhgimi të shkurtër kur ai luante te Sportingu i Lisbonës. Sipas tij, talenti i portugezit ishte i dukshëm që në moshë shumë të re, jo vetëm nga aftësitë teknike, por edhe nga mentaliteti fitues.
“Ishte fantastike. Në jetën profesionale takon lojtarë të jashtëzakonshëm. Që në moshën 17-vjeçare e dija se ai kishte diçka të veçantë, jo vetëm talentin, por edhe dëshirën për t’u bërë më i miri”, ka thënë Ferguson.
Ish-trajneri i Mançester Junaitid thekson përkushtimin ekstrem të Ronaldos në stërvitje, duke zbuluar se ai punonte vazhdimisht për të përmirësuar çdo detaj të lojës së tij.
“Pas çdo seance stërvitore, ai qëndronte për të praktikuar goditjet e lira. Nuk ishte thjesht i talentuar, por kishte një etje të pazakontë për përmirësim”, u shpreh Ferguson.
Ai foli gjithashtu për ndikimin e Ronaldos në dhomën e zhveshjes, duke e cilësuar si shembull për shokët e skuadrës dhe një lider natyral, pavarësisht moshës së re.
“Ambicia dhe përkushtimi i tij e bënë një udhëheqës të lindur. Të gjithë e shikonin si model”, shtoi Ferguson.
Marrëdhënia mes Ferguson dhe Ronaldos mbetet një shembull i qartë se si një trajner i madh mund të zbulojë dhe të zhvillojë një talent të jashtëzakonshëm. Jo më kot, Kristiano Ronaldo vazhdon të konsiderohet si një nga futbollistët më të mëdhenj të të gjitha kohërave, ndërsa Ferguson pranon se suksesin e tij e kishte parashikuar që në adoleshencë.
