Më shumë se gjysmë milioni njerëz në Gaza janë në prag të urisë, paralajmëruan agjencitë e Kombeve të Bashkuara, ndërsa Këshilli i Sigurimit i OKB-së diskutoi sigurinë ushqimore në enklavën e goditur palestineze.
Zyra e OKB-së për Koordinimin e Çështjeve Humanitare tha se të paktën 576,000 njerëz në të gjithë Gazën “po përballen me nivele katastrofike të privimit dhe urisë”.
Ndërkohë, Programi Botëror i Ushqimit i OKB-së (WFP) paralajmëroi “për një perspektivë reale të urisë deri në maj, me 500,000 njerëz në rrezik nëse kërcënimi lejohet të materializohet”.
Sot, ndihma ushqimore kërkohet nga pothuajse e gjithë popullsia prej 2.2 milionë banorësh. Gaza po sheh nivelin më të keq të kequshqyerjes së fëmijëve kudo në botë”, I tha Këshillit të Sigurimit Carl Skau, Zëvendës Drejtori Ekzekutiv i WFP.
“Një në çdo gjashtë fëmijë nën moshën 2 vjeç është i kequshqyer në mënyrë akute.”
Ndërsa negociatat për armëpushimin vazhdojnë, Skau tha se WFP është gati të zgjerojë me shpejtësi operacionet nëse arrihet një marrëveshje.
“Kërkohet veprim i menjëhershëm për të mundësuar një rritje të madhe të vëllimit të ushqimit dhe furnizimeve të tjera humanitare”,tha ai.
