Deputeti i Partia Demokratike, Klevis Balliu, ka akuzuar qeverinë e Edi Rama se ka lejuar pastrimin masiv të parave të drogës në Shqipëri, duke deklaruar se vendi është kthyer në një “lavatriçe” të krimit të organizuar.
Gjatë një tryeze të organizuar nga PD me temën “Qeveria e Pasigurisë – Dështimi i Ramës dhe alternativa e opozitës”, Balliu tha se kartelet shqiptare janë të vetmet në botë që pastrojnë paratë e tyre në vendin e origjinës.
“Raporti i antimafias italiane deklaron se kartelet shqiptare janë të vetmet kartele në botë që pastrojnë paratë e tyre në vendin e origjinës, sepse këtu kanë një siguri dhe ajo siguri është vetë Edi Rama”, deklaroi ai.
Sipas Balliut, sektori i ndërtimit është kthyer në mekanizmin kryesor të pastrimit të parave, duke sjellë rritje artificiale të çmimeve të apartamenteve në kryeqytet.
“Sot Tirana ka çmime apartamentesh si Milano, ndërkohë që të ardhurat e shqiptarëve janë qesharake krahasuar me Europën”, tha deputeti demokrat.
Ai akuzoi gjithashtu se grupet kriminale janë infiltruar në institucione shtetërore dhe në administratë, duke përmendur edhe AKSHI si një prej institucioneve ku, sipas tij, kartelet kanë ndikuar në ndarjen e tenderëve publikë.
Balliu deklaroi se një pjesë e madhe e investimeve në ndërtim dhe resorte turistike nuk justifikohen financiarisht.
“Shohim individë 25 apo 27 vjeç që dalin me investime 50 apo 100 milionë euro në resorte turistike, pa asnjë burim të qartë financiar”, u shpreh ai.
Deputeti demokrat përmendi edhe raportet ndërkombëtare të OSBE-ODIHR dhe të Departamentit Amerikan të Shtetit, duke pretenduar se ato kanë evidentuar ndikimin e krimit të organizuar në proceset zgjedhore dhe ekonominë shqiptare.
Në fund, Balliu tha se opozita synon konfiskimin e pasurive të lidhura me krimin e organizuar, por shtoi se nuk ka besim te institucionet aktuale për realizimin e kësaj lufte.
