Deputeti i Partisë Demokratike, Belind Këlliçi, e cilësoi protestën e fundit të opozitës si “të jashtëzakonshme”, duke theksuar se ajo reflektoi, sipas tij, pakënaqësinë e qytetarëve.
I ftuar në një emision televiziv, Këlliçi deklaroi se protestat kanë qenë paqësore dhe akuzoi qeverinë për tentativa për të nxitur tensione përmes skenarëve të infiltrimit, të cilat sipas tij janë demontuar nga media dhe opozita.
Ai ngriti akuza ndaj drejtuesve të Policisë së Shtetit dhe kryeministrit, duke pretenduar se ka pasur mungesë garantimi të sigurisë gjatë tubimit. Sipas deputetit, presioni dhe arrestimet nuk do ta ndalin opozitën.
Këlliçi paralajmëroi se në ditët në vijim pritet të mblidhen forumet e larta të partisë për të njoftuar protestën e radhës, e cila sipas tij do të jetë edhe më e fortë.
Në fund, ai theksoi se demokratët “nuk i harrojnë ata që shkelin ligjin dhe vjedhin paratë e shqiptarëve”, duke shtuar se reagimi opozitar do të vijojë.
