Jola Hysaj ka njoftuar dorëheqjen nga të gjitha funksionet dhe nga anëtarësia në Partinë Demokratike, duke bërë publike vendimin e saj përmes një reagimi në rrjetet sociale.
Në një postim të gjatë, Hysaj ka renditur disa shqetësime që lidhen me funksionimin e partisë, duke përmendur ndër të tjera mungesën e hapjes reale dhe disa problematika të brendshme në organizimin politik.
Lidhur me këtë zhvillim ka reaguar edhe kryetari i Partisë Demokratike, Sali Berisha, i cili bëri të ditur se vendimi i saj i ishte komunikuar fillimisht përmes një mesazhi.
Sipas Berishës, në mesazhin që i kishte dërguar, Hysaj e falënderonte për bashkëpunimin dhe e njoftonte për vendimin për t’u tërhequr nga aktiviteti politik brenda PD-së.
“Jola Hysaj më ka dërguar një mesazh në të cilin më falënderon për bashkëpunimin dhe më njofton për vendimin e saj për të dhënë dorëheqjen. Unë e falënderoj për kontributin që ka dhënë dhe respektoj plotësisht vendimin e saj”, u shpreh Berisha.
Ai shtoi se dorëheqjet janë një akt normal në një parti demokratike dhe se vendimi i Hysajt është një zgjedhje personale që duhet respektuar.
Dorëheqja e saj vjen në një moment kur brenda Partisë Demokratike po zhvillohen diskutime për organizimin e brendshëm dhe strategjitë politike të opozitës në vijim.
