Kreu i Partisë Demokratike, Sali Berisha, ka deklaruar se opozita do të vijojë me protesta, duke e cilësuar situatën politike si “kilometrin e fundit” dhe duke falënderuar qytetarët për pjesëmarrjen masive dhe reagimin e tyre.
Në një deklaratë për mediat, Berisha theksoi se protestat nuk kanë karakter personal apo partiak, por janë shprehje e ndërgjegjes qytetare dhe reagim ndaj asaj që ai e cilëson si vjedhje masive të fondeve publike.
Ai u bëri thirrje të gjithë qytetarëve që të bashkohen në protestat e ardhshme, duke theksuar se fondet e dyshuara si të vjedhura prekin interesat e të gjithëve, veçanërisht të brezave të rinj.
Kreu i PD-së vuri theksin te pjesëmarrja e rinisë në protestë, duke e cilësuar atë si elementin më domethënës të tubimit. Sipas tij, prania e të rinjve ka shkaktuar reagimin e ashpër të kryeministrit, të cilin e akuzoi për gjuhë fyese ndaj protestuesve.
“Padyshim do të ketë protesta dhe vetëm protesta. Jemi në kilometrin e fundit. Kjo nuk është protestë për një person apo për një parti, por protestë e ndërgjegjes qytetare. Kur themi se janë vjedhur qindra miliona euro, ato nuk janë vetëm të fëmijëve të opozitarëve, por të fëmijëve të të gjithë shqiptarëve,” u shpreh Berisha.
Ai përfundoi duke deklaruar se opozita do të angazhojë të gjithë potencialin e saj në vijim të protestave, duke i konsideruar ato si mjetin kryesor të reagimit politik dhe qytetar në këtë fazë.
