Mjeku Ilir Pecnikaj ka ngritur shqetësime të forta mbi gjendjen e sistemit shëndetësor dhe sigurinë ushqimore në Shqipëri gjatë një fjalimi në tubimin e opozitës përpara Kryeministrisë.
Sipas tij, lista e barnave të rimbursueshme në Shqipëri mbetet shumë e kufizuar krahasuar me vendet e Bashkimi Evropian, duke përfshirë vetëm një të katërtën e medikamenteve të disponueshme në vendet europiane.
Ilir Pecnikaj u ndal veçanërisht te barnat onkologjike, duke deklaruar se medikamenti më i fundit i përfshirë në listën e rimbursimit daton që nga viti 2016.
Ai tha se vetëm gjatë vitit 2025 në vendet e BE-së janë regjistruar 56 barna të reja antitumorale dhe paralajmëroi se, me ritmin aktual, këto trajtime mund të mbërrijnë në Shqipëri vetëm pas shumë vitesh.
“Ne nuk jemi thjesht mbrapa, ne po i lëmë të sëmurët tanë të vdesin”, deklaroi ai gjatë fjalës së tij.
Mjeku ngriti shqetësime edhe për sigurinë ushqimore, duke iu referuar një artikulli të publikuar më 15 maj në një revistë ndërkombëtare për sigurinë ushqimore.
Sipas tij, nga 62 kampione të analizuara, 56 rezultuan me nivele pesticidesh mbi normat e lejuara, ndërsa disa prej substancave të identifikuara janë të ndaluara prej vitesh në Shqipëri dhe në vendet e BE-së.
Ai pretendoi se në disa raste nivelet e pesticideve kanë qenë deri në 350% mbi kufijtë e lejuar, ndërsa e cilësoi situatën si tregues të kontrabandës dhe mungesës së kontrollit institucional.
Në fund të fjalës së tij, Ilir Pecnikaj akuzoi qeverinë për neglizhencë në menaxhimin e sektorit të shëndetësisë dhe sigurisë ushqimore, duke kërkuar më shumë transparencë dhe reagim institucional.
