Ikona “Shën Maria me Krishtin” pas restaurimit do të ekspozohet për publikun

Ndërhyrja restauruese e ikonës “Shën Maria me Krishtin”, shekulli XVIII, vepër e ateliesë së Tërpo Zografit ka përfunduar. Muzeu Kombëtar i Artit Mesjetar shprehet se sot ikona paraqitet në shkëlqimin e saj të dikurshëm dhe së shpejti do të ekspozohet për publikun e gjerë. Sipas Muzeut Kombëtar të Artit Mesjetar në Korçë restaurimi përfundoi pas një pune disa mujore, kryer në laboratorin e Restaurimit pranë këtij institucioni. “Kjo ikonë është me origjinë nga fshati Pojan, Korçë. Ndërhyrjet konservuese që u kryen në shtresën e gruntit dhe atë të pikturës: Largimi i depozitimeve jo të qëndrueshme mbi sipërfaqe me anë të një peneli të butë në zonat ku kjo ishte e mundur. Konsolidimi i shtresës të gruntit dhe pikturës u krye me tretësirë të ngrohtë xhelatine të tretur në ujë. Kjo u bë duke e shtrirë atë me penel të butë në gjithë sipërfaqen e veprës duke përdorur letra japoneze. Më pas u vendosën sërish disa shtresa me letra pambuku dhe u kalua sipër me spatulën e nxehtë që lidhësi të depërtonte sa me mirë dhe të siguronte qëndrueshmëri të gruntit dhe pikturës. Pasi përfundoi procesi letrat u hoqën me ujë të ngrohtë dhe pambuk hidrofil”, thuhet nga MKAM. Sipas muzeut që ka ndarë dhe foto të ikonës në faqen e tij, heqja graduale e vernikut të oksiduar u bë me ethanol absolut 98 për qind. Neutralizimi i veprimit të tretësit u bë me white spirit. Mbetjet organike si dylli i qirinjve, etj, u hoqën në mënyrë mekanike me bisturi. U përdor eterpetroleum për heqje më të mirë të mbetjeve të tyre. Po ashtu sipas MKAM, u bënë ritokime esteike në pjesët ku ishte dëmtuar piktura me ngjyra akuareli Rembrandt të prodhimit Talens. Ngjyrat u përzihen me Oxgall për të përmirësuar lidhjen. “Në fund u kaluan disa shtresa të holla verniku të kryqëzuara dhe në intervale 4-5 ditore nga shtresa në shtresë që të mund të thaheshin. U përdor venik damar mat i prodhimit Schmincke bashkë me vernik retouche po i këtij prodhimi”, thuhet nga muzeu në Korçë. Herë pas here MKAM bën me dije ndërhyrjet restauruese me ikonat.