Detaje të reja janë bërë publike nga hetimet që lidhen me vilën në kompleksin “White Rocks” në Dhërmi, pasuri e sekuestruar në kuadër të procedimit penal ndaj ish-zëvendëskryeministres Belinda Balluku.
Sipas materialeve hetimore të raportuara në media, SPAK dyshon se janë ndërmarrë veprime për të fshehur gjurmë që lidhen me investimet e kryera në këtë pronë, e cila është në qendër të hetimeve për korrupsion dhe pastrim parash.
Në një deklarim të dhënë para autoriteteve, një menaxher shitjesh i shoqërisë “Brunes” ka treguar se kishte bashkëpunuar me shtetasin Julian Kelo për furnizimin me materiale ndërtimi dhe pajisje të nevojshme për ndërtimin e një pishine në një kompleks vilash në Dhërmi.
Sipas dëshmisë, porositë janë kryer gjatë vitit 2020 dhe janë shoqëruar me dokumentacion fiskal, ndërsa materialet janë transportuar drejt zonës së Dhërmiut dhe Palasës. Menaxheri deklaron se komunikimet fillestare janë zhvilluar përmes emailit të punës, ku janë shkëmbyer fletëporosi dhe preventivë për materialet që do të përdoreshin në projekt.
Në deklarimin e tij, ai pretendon se gjatë një takimi të zhvilluar në muajin maj 2026, Julian Kelo ka kërkuar sqarime mbi blerjet e kryera dhe komunikimet e mëparshme. Sipas dëshmitarit, pasi u identifikua një email që lidhej me porosinë fillestare të materialeve, Kelo ka kërkuar që ai të fshihej.
Menaxheri ka deklaruar se nuk e ka pranuar këtë kërkesë, duke sqaruar se nuk kishte akses për fshirjen e të dhënave dhe se çdo transaksion mbetet i dokumentuar në faturat tatimore dhe sistemet përkatëse.
Sipas dëshmisë, pas këtij momenti Kelo është larguar nga ambientet e kompanisë.
Ndërkohë, SPAK ka shtuar ndaj Belinda Ballukut edhe akuzat për korrupsion pasiv dhe pastrim të produkteve të veprës penale, në vijim të hetimeve që lidhen me përfitimin e dyshuar të një vile në kompleksin “White Rocks”.
Hetimet janë ende në zhvillim dhe nuk ka një vendim gjyqësor përfundimtar mbi çështjen. Në përputhje me parimin e prezumimit të pafajësisë, të gjithë personat e përmendur konsiderohen të pafajshëm deri në një vendim të formës së prerë të gjykatës.
