Avokati Idajet Beqiri ka ngritur akuza të forta ndaj Prokurorisë së Posaçme, duke deklaruar se hetimet ndaj figurave të larta politike si Ilir Meta dhe Sali Berisha përfaqësojnë vetëm “maja e ajsbergut” dhe nuk prekin thelbin e korrupsionit dhe krimeve shtetërore të kryera ndër vite.
Sipas Beqirit, qëllimi real i SPAK nuk duket të jetë ndëshkimi i plotë i korrupsionit dhe krimeve të rënda, por largimi i disa figurave nga politika përmes çështjeve më të vogla, të cilat çojnë në dënime të kufizuara dhe më pas në përjashtim nga jeta politike.
Ai theksoi se në rastin e Ilir Metës, hetimet nuk duhet të kufizohen vetëm te dosja CEZ-DIA, por duhet të shtrihen edhe në çështje të tjera të rënda që, sipas tij, janë lënë jashtë vëmendjes së drejtësisë. Beqiri përmendi edhe akuza të tjera publike ndaj Metës, duke thënë se numri i dosjeve potenciale është shumë më i madh sesa ato që po hetohen aktualisht.
Në lidhje me Sali Berishën, avokati u shpreh se çështja e kompleksit “Partizani” është vetëm një element i vogël krahasuar me akuzat e tjera që rëndojnë mbi ish-kryeministrin dhe familjen e tij. Ai kritikoi faktin që SPAK, sipas tij, nuk ka çuar në gjyq çështje të rënda si vrasjet në Tropojë apo ngjarjet e 21 janarit.
Beqiri e cilësoi 21 janarin si “krim shtetëror”, duke kujtuar se kjo është përcaktuar edhe nga Gjykata Evropiane e të Drejtave të Njeriut në Strasburg. Ai ngriti pyetjen pse kjo çështje nuk është dërguar ende për gjykim, pavarësisht përgjegjësive politike dhe institucionale të njohura publikisht.
“Pse SPAK nuk e çon në gjyq krimin shtetëror të 21 janarit?”, ishte pyetja që Beqiri e përsëriti, duke shtuar se drejtësia nuk mund të jetë selektive dhe se hetimet duhet të shkojnë deri në fund, pa dallim emrash apo pozicionesh politike.
