Në seancën e radhës në Gjykatën e Posaçme, në kuadër të dosjes së njohur si “Plumbi i artë”, i pandehuri Henrik Hoxhaj ka dhënë dëshmi lidhur me atentatin ndaj biznesmenit Lulzim Masha.
Sipas deklarimeve të tij në gjykatë, Nuredin Dumani i kishte ofruar 100 mijë euro për vrasjen e Mashës dhe 150 mijë euro për vrasjen e të birit. Hoxhaj pretendoi se porosia fillestare kishte qenë për djalin e biznesmenit, por për shkak se nuk ishte arritur të lokalizohej, plani kishte ndryshuar duke synuar të atin.
Në dëshminë e tij, Hoxhaj tha se motivi lidhej me një konflikt pasuror. Sipas tij, vëllai i Eldi Dizdarit kishte pasur një lidhje me vajzën e Lulzim Mashës dhe disa pasuri me vlerë të konsiderueshme ishin kaluar në emrin e saj. Pas përfundimit të marrëdhënies, pretendon Hoxhaj, pasuritë nuk ishin rikthyer.
Ai deklaroi gjithashtu se arma e përdorur në atentat ishte siguruar nga Aleksandër Baho, i njohur me nofkën “Sakati”, ndërsa shtoi se arma i ishte bllokuar personit që do të qëllonte në momentin e ngjarjes. Sipas tij, atentati ndaj Mashës kishte si synim të detyronte daljen e të birit nga jashtë vendit.
Megjithatë, deklaratat e Hoxhajt janë parë me rezerva, pasi më herët ai kishte dhënë versione të ndryshme lidhur me porositësin e ngjarjes. Edhe dëshmia e tij bie në kontradiktë me deklarimet e Nuredin Dumanit, i cili ka pretenduar se porositësi ishte Aleksandër Baho.
Atentati ndaj Lulzim Mashës u regjistrua më 18 janar të vitit të kaluar në zonën e Liqenit të Thatë në Tiranë. Një person i paidentifikuar qëlloi me armë zjarri në drejtim të automjetit të tij, por fatmirësisht nga ngjarja nuk pati persona të lënduar.
Procesi gjyqësor vijon, ndërsa trupi gjykues do të vlerësojë dëshmitë dhe provat e paraqitura nga palët.
