Një gjykatë në Suedi ka vendosur që Google të paguajë rreth 1.5 miliardë dollarë dëmshpërblim ndaj PriceRunner, pasi konstatoi shkelje të rregullave të konkurrencës.
PriceRunner, e cila është në pronësi të Klarna, kishte ngritur padi në vitin 2022, duke pretenduar se Google favorizonte në mënyrë të padrejtë shërbimet e veta të krahasimit të çmimeve në rezultatet e kërkimit, në dëm të konkurrentëve.
Sipas gjykatës, edhe pse padia nuk u pranua plotësisht, dëmshpërblimi i akorduar përbën shumën më të madhe të dhënë ndonjëherë nga një gjykatë suedeze në një çështje të konkurrencës.
“Edhe pse PriceRunner nuk arriti sukses të plotë me padinë e saj, dëmshpërblimi i dhënë është pa dyshim më i madhi në historinë e çështjeve suedeze të konkurrencës”, deklaroi zyrtarja gjyqësore Linda Kullberg.
Fillimisht, PriceRunner kishte kërkuar rreth 2.1 miliardë euro dëmshpërblim, ndërsa me interesat e përllogaritura pretendimi arrinte në rreth 8 miliardë dollarë.
Çështja lidhet me një vendim të mëparshëm të Komisioni Evropian, i cili në vitin 2017 vendosi ndaj Google një gjobë prej 2.42 miliardë eurosh për abuzim me pozitën dominuese në treg, duke konstatuar se kompania kishte favorizuar shërbimin e saj të krahasimit të blerjeve në rezultatet e kërkimit.
Vendimi i gjykatës suedeze pritet të rrisë më tej presionin ndaj kompanive të mëdha të teknologjisë, ndërsa autoritetet evropiane vijojnë të forcojnë zbatimin e rregullave të konkurrencës në tregun digjital.
