Gjykata e Posaçme Kundër Korrupsionit dhe Krimit të Organizuar ka rrëzuar kërkesën e kryebashkiakut të Tiranës, Erion Veliaj, për përjashtimin e gjyqtares Etleva Deda nga shqyrtimi i çështjes penale ku ai është i përfshirë.
Vendimi është marrë nga gjyqtari Bib Ndreca, i cili e ka cilësuar kërkesën e paraqitur nga ana e mbrojtjes si të pabazuar ligjërisht dhe pa argumente konkrete që të justifikonin largimin e gjyqtares nga procesi.
Sipas GJKKO-së, pretendimet e ngritura nga Veliaj lidhur me sjelljen e gjyqtares gjatë seancave paraprake nuk plotësojnë kriteret ligjore për përjashtim dhe nuk përbëjnë cenim të paanshmërisë apo të rregullsisë së procesit gjyqësor.
Me këtë vendim, gjyqtarja Etleva Deda do të vijojë të jetë pjesë e trupës gjykuese dhe të shqyrtojë dosjen që lidhet me hetimet ndaj kryetarit të Bashkisë së Tiranës.
Rrëzimi i kërkesës konsiderohet një zhvillim i rëndësishëm në ecurinë e procesit penal, duke i hapur rrugë vijimit normal të gjykimit dhe duke i dhënë një goditje strategjisë mbrojtëse të Veliajt për të ndikuar në përbërjen e trupës gjykuese.
