Autoritetet e shtetit të Viktorias në Australi kanë shpallur gjendje katastrofe për shkak të përhapjes së pakontrolluar të zjarreve në vegjetacion, të cilat prej ditësh po shkatërrojnë banesa, pyje dhe toka bujqësore.
Vala ekstreme e të nxehtit, me temperatura mbi 40 gradë Celsius, e shoqëruar me erëra të forta dhe ajër shumë të thatë, ka krijuar kushte ideale për përhapjen e flakëve. Situata po krahasohet me “verën e zezë” të viteve 2019–2020, një nga periudhat më shkatërruese të zjarreve në historinë e vendit.
Një nga zjarret më të mëdha ka përfshirë rreth 1.5 milionë dynymë tokë pranë zonës së Longwood-it, rreth 150 kilometra nga Melburni, duke shkrumbuar zona të gjera pyjore dhe duke rrezikuar komunitete të tëra.
Gjendja e katastrofës u jep autoriteteve dhe zjarrfikësve kompetenca të zgjeruara për evakuime emergjente dhe masa të jashtëzakonshme sigurie. Autoritetet kanë bërë thirrje të qarta për banorët që të largohen menjëherë nga zonat e rrezikuara, sapo të marrin njoftime zyrtare.
Sipas shërbimeve të emergjencës, të paktën 130 ndërtesa janë shkatërruar deri tani, ndërsa dhjetë zjarre të mëdha vazhdojnë të jenë aktive. Disa prej tyre pritet të zgjasin për ditë apo edhe javë, për shkak të kushteve të pafavorshme atmosferike.
Qindra zjarrfikës nga e gjithë Australia janë angazhuar në operacionet e shuarjes së flakëve. Në disa zona, intensiteti i zjarrit ka qenë aq i lartë sa ka krijuar edhe stuhi lokale për shkak të nxehtësisë ekstreme të çliruar.
Ekspertët paralajmërojnë se rritja e temperaturave mesatare dhe ndryshimet klimatike po e bëjnë sezonin e zjarreve gjithnjë e më të rrezikshëm, duke rritur shpeshtësinë dhe ashpërsinë e këtyre fatkeqësive natyrore.
