Eksperti i IT-së, Gent Progni, iu drejtua protestuesve gjatë tubimit të zhvilluar në Tiranë, duke komentuar pjesëmarrjen e qytetarëve dhe duke ngritur akuza për presione ndaj personave që kanë zgjedhur t’i bashkohen protestës.
Në fjalën e tij, Progni ironizoi deklaratat që, sipas tij, janë bërë lidhur me numrin e pjesëmarrësve në protestë, ndërsa vlerësoi mobilizimin e qytetarëve dhe të shqiptarëve të diasporës.
“Unë i them shefit të Zeqinesë, sa 17 mijë e 850 mijë jemi sot. Ka tre ditë që na bëjnë presione me civilë dhe fotografi. Me kamerat këtu çojnë mesazhe që njerëzit të mos vijnë në protestë. Tani që ka ardhur diaspora, kë do të hiqni nga puna?”, deklaroi Progni nga foltorja.
Ai pretendoi se gjatë ditëve të fundit janë ushtruar presione ndaj qytetarëve për të mos marrë pjesë në protestë, duke shtuar se prania e shqiptarëve të ardhur nga vende të ndryshme ka rritur ndjeshëm pjesëmarrjen në tubim.
Protesta, e cila po zhvillohet në qendër të kryeqytetit, ka mbledhur qytetarë nga Shqipëria dhe diaspora, të cilët kanë shprehur qëndrimet e tyre mbi zhvillimet politike në vend dhe kanë paraqitur kërkesa të ndryshme drejtuar institucioneve shtetërore.
Gjatë aktivitetit, folës të ndryshëm kanë mbajtur fjalime para pjesëmarrësve, ndërsa organizatorët e kanë cilësuar tubimin si një manifestim qytetar për ndryshim dhe reforma demokratike.
