Një artikull i publikuar nga portali austriak Exxtra24.at, që përmbante pretendime të pakonfirmuara lidhur me zv/kryeministren Belinda Balluku, është fshirë nga faqja zyrtare e medias vetëm pak kohë pas publikimit.
Shkrimi në fjalë i referohej burimeve të paidentifikuara dhe përmendte ekzistencën e një materiali të dyshuar komprometues, autenticiteti i të cilit nuk ishte konfirmuar zyrtarisht. Artikulli u ripublikua nga disa media shqiptare, por aktualisht nuk është më i aksesueshëm në portalin origjinal. Deri tani nuk ka një reagim zyrtar nga Exxtra24.at mbi arsyet e heqjes së tij.
Kush është pas Exxtra24.at?
Sipas të dhënave publike, Exxtra24.at është një media digjitale me seli në Austri, e themeluar në fillim të vitit 2025. Themelues dhe drejtues i saj është Markus Posset, i cili prezantohet si menaxher mediatik dhe konsulent biznesi. Ai mban gjithashtu titullin e Honorarkonsulit.
Burime publike tregojnë se Posset ka pasur më parë rol si Konsull Nderi i Shqipërisë në Austri. Në profile publike janë publikuar edhe fotografi të tij në aktivitete zyrtare me përfaqësues të institucioneve shqiptare.
Misteri i zhdukjes së artikullit
Fshirja e artikullit ka ngritur pikëpyetje mbi procesin editorial dhe verifikimin e informacionit. Në mungesë të një sqarimi zyrtar nga portali, mbetet e paqartë nëse vendimi për heqjen e materialit lidhet me mungesë verifikimi, çështje ligjore apo standarde etike.
Ndërkohë, çështja ka hapur debat mbi përgjegjësinë e mediave në publikimin e pretendimeve të pakonfirmuara, sidomos kur bëhet fjalë për figura publike dhe informacione sensitive.
Deri në një reagim zyrtar nga palët e përfshira, ngjarja mbetet në nivelin e raportimeve dhe diskutimeve mediatike.
