Franca ka shtuar ndjeshëm masat e sigurisë në të gjithë territorin, veçanërisht në Paris, pas një sulmi të parandaluar me bombë dhe rritjes së kërcënimeve të lidhura me Irani.
Autoritetet franceze njoftuan se policia ka forcuar mbrojtjen rreth objekteve fetare, kulturore, diplomatike dhe qendrave ekonomike, ndërsa disa banka amerikane në Francë dhe Gjermani u kanë kërkuar punonjësve të punojnë nga shtëpia si masë paraprake.
Hetimet lidhen me një sulm të dështuar ndaj zyrave të Bank of America, ku katër persona – tre adoleshentë dhe një i rritur – janë vënë nën hetim. Sipas prokurorëve, pajisja shpërthyese e improvizuar ishte ndër më të fuqishmet e këtij lloji të zbuluara ndonjëherë në vend.
Policia dyshon se sulmi ishte i lidhur me një grup pro-iranian, i cili më herët kishte publikuar materiale që lidhen me objektivin e sulmit.
Nga Koreja e Jugut, ku ndodhej për një vizitë zyrtare, presidenti Emmanuel Macron deklaroi se kërcënimi është real dhe në rritje, duke paralajmëruar se situata nuk prek vetëm Francën, por edhe vende të tjera europiane.
Autoritetet janë të shqetësuara se përshkallëzimi i konfliktit në Lindjen e Mesme mund të nxisë akte të ngjashme në Evropë, duke e kthyer sigurinë e brendshme në një prioritet të menjëhershëm për qeveritë europiane.
