Sekretari i Përgjithshëm i Partia Demokratike, Flamur Noka, ka reaguar nga selia blu lidhur me procesin e aplikimeve për zgjedhjen e kryetarit të ri të partisë.
Noka deklaroi se çdo anëtar i PD-së që ka dëshirë dhe plotëson kriteret e përcaktuara mund të aplikojë për të garuar, duke mohuar kategorikisht pretendimet për refuzim të kandidaturave.
Sipas tij, procesi ka qenë transparent që nga momenti i shpalljes së garës, ndërsa afati për aplikime ka qenë i mjaftueshëm për të gjithë të interesuarit.
“Çdo anëtar i PD që ka dëshirë dhe plotëson kriteret mund të aplikojë. Asnjë anëtari të Partisë Demokratike nuk i është refuzuar aplikimi”, u shpreh Noka.
I pyetur për kandidaten Mereme Sela, e cila deri më tani konsiderohet si një nga emrat në garë përballë Sali Berisha, ai tha se mbetet për t’u verifikuar nëse ajo i përmbush kriteret e kërkuara.
Noka theksoi se vendimi për hapjen e garës është marrë më herët nga kryesia e partisë dhe është bërë publik që në muajin mars, duke nënvizuar se nuk ka munguar transparenca gjatë gjithë procesit.
Deklaratat e tij vijnë në një moment kur disa kandidatë dhe përfaqësues të tyre kanë ngritur akuza për pengesa në dorëzimin e dokumentacionit, duke e cilësuar procesin jo të barabartë.
