Ervin Salianji ka lëshuar akuza të forta ndaj drejtimit aktual të Partia Demokratike e Shqipërisë dhe kreut të saj Sali Berisha, duke deklaruar se ai nuk ka mbështetje reale në parti dhe nuk mund ta çojë opozitën drejt fitores.
I ftuar në një studio televizive, Salianji tha se mbështetja ndaj Berishës lidhet me interesa dhe privilegje brenda strukturave të partisë.
“Më thoni një njeri pa rrogë në PD që thotë fiton Berisha. Ka një lidhje privilegji diku dhe ai mbron privilegjin e vet”, deklaroi ai.
Salianji shtoi se drejtimi aktual e ka kthyer PD-në në një parti të “uzurpuar” dhe “peng”, ndërsa theksoi se nuk beson se Berisha mund të rikthejë opozitën në pushtet.
“Unë kam interes që PD të bëhet fituese. Bëhet fituese me Sali Berishën? As sot, as kurrë”, tha ish-deputeti demokrat.
Ai përjashtoi gjithashtu rikthimin e skenarëve të tensionuar të së kaluarës brenda partisë, duke iu referuar ngjarjeve të 8 janarit.
“Të shkoj unë të prodhoj një situatë që s’nderon asnjërin si në 8 janar? E bëj që nesër”, u shpreh Salianji.
Në deklaratat e tij, Salianji foli edhe për marrëdhëniet e PD-së me faktorët ndërkombëtarë, duke pretenduar se selia blu është izoluar për shkak të drejtimit aktual.
“Sot, për shkak se PD ka kryetar këtë zotërinë, nuk hyn ndonjë ambasador. Takojnë gjithë të tjerët”, deklaroi ai.
Sipas Salianjit, për të kompensuar mungesën e kontakteve zyrtare ndërkombëtare, Berisha, sipas tij, “sajon” takime përmes njohjeve personale.
Ish-deputeti konfirmoi se do të vazhdojë takimet me demokratët dhe aktivitetin e tij politik paralelisht me zhvillimet brenda partisë, derisa, sipas tij, çështjet të zgjidhen me votë.
