Ish-ministrja e Financave dhe ish-deputetja e Partisë Socialiste, Ermelinda Meksi, ka reaguar pas publikimit të aktit normativ që, sipas dokumenteve të publikuara, parashikon financimin e koncertit të artistit Kanye West me 4.2 milionë euro nga fondi rezervë i buxhetit të shtetit.
Në një reagim publik, Meksi kërkon që Kuvendi të ushtrojë kontrollin e tij kushtetues dhe parlamentar mbi këtë vendimmarrje, duke verifikuar nëse janë përmbushur kriteret ligjore për përdorimin e fondit rezervë.
Sipas saj, qytetarët kanë të drejtë të marrin një shpjegim të qartë mbi bazën ligjore të aktit normativ dhe nëse janë respektuar kushtet e “nevojës” dhe “urgjencës”, të parashikuara nga legjislacioni.
“Qytetarët kanë të drejtë të marrin një shpjegim të qartë nëse janë përmbushur kushtet e ‘nevojës’ dhe ‘urgjencës’ për nxjerrjen e këtij akti normativ, si dhe nëse përdorimi i fondit rezervë është bërë në përputhje me Kushtetutën dhe legjislacionin në fuqi,” shkruan Meksi.
Ajo thekson se transparenca, llogaridhënia dhe respektimi i ligjit janë parime themelore të administrimit të financave publike dhe se Kuvendi ka përgjegjësinë të shqyrtojë ligjshmërinë e aktit.
Në përfundim, ish-ministrja shprehet se çdo përdorim i fondeve publike duhet të jetë i ligjshëm, i arsyetuar, proporcional dhe në funksion të interesit publik, duke kërkuar një shqyrtim të plotë dhe transparent të çështjes.
Deri në këtë moment nuk ka një reagim zyrtar nga Këshilli i Ministrave ose Kryeministria lidhur me deklaratat e Meksit.
