Deputeti i Partisë Socialiste, Erion Braçe, ka reaguar në Kuvend lidhur me fenomenin e Call Center-ave mashtrues, duke theksuar se bëhet fjalë për një aktivitet të hershëm në Shqipëri që kërkon ndërhyrje më të fortë institucionale.
Në fjalën e tij, Braçe u shpreh se ky aktivitet ka qenë prej kohësh në vëmendje dhe se ai vetë ka kërkuar shpjegime nga institucionet përgjegjëse, përfshirë autoritetet financiare dhe organet e rendit. Ai bëri të ditur se ka kërkuar organizimin e një seance të përbashkët mes institucioneve si Autoriteti i Mbikëqyrjes Financiare, Tatimet, Policia e Shtetit dhe strukturat kundër krimit kibernetik për të trajtuar fenomenin në mënyrë të koordinuar.
Sipas tij, aktiviteti i Call Center-ave mashtrues nuk përbën krim shtetëror, por është vepër e individëve që shfrytëzojnë këtë skemë për të mashtruar qytetarë europianë. Megjithatë, ai theksoi se pasojat janë serioze për reputacionin e vendit.
Braçe kërkoi që agjencitë ligjzbatuese të intensifikojnë punën për goditjen e këtyre rrjeteve, duke nënvizuar se aktiviteti i tyre “turpëron dhe shkatërron imazhin e Shqipërisë” në raport me vendet e Bashkimit Europian.
Në përfundim, ai kritikoi edhe mënyrën se si trajtohen këto çështje në diskursin publik, duke i cilësuar disa rrëfime si të ekzagjeruara dhe më shumë të ngjashme me skenarë filmash sesa me trajtim serioz të fakteve.
