Deputeti i Partia Socialiste e Shqipërisë, Erion Braçe, ka reaguar me tone të forta pas largimit të tij nga drejtimi politik i qarkut të Fierit, ku në krye të socialistëve u vendos Belinda Balluku.
Në një intervistë televizive, Braçe deklaroi se mënyra se si u largua nga Fieri nuk kishte lidhje me demokracinë e brendshme në PS, duke i bërë thirrje vendimmarrësve të shpjegojnë arsyet e këtij ndryshimi.
Ai tha se nuk kishte dashur të largohej nga Divjaka dhe Lushnja, zona ku ka ushtruar aktivitetin politik prej vitesh, ndërsa shtoi se prania e tij nuk do të kishte sjellë humbje elektorale për socialistët.
Braçe u shfaq kritik edhe ndaj rolit të Ballukut në Fier, duke deklaruar se nuk sheh angazhim konkret të saj për çështjet e fermerëve dhe bujqësisë.
“Do doja që prezenca e saj të ndihmonte në ato çështje që kanë lidhje me bujqësinë. Deri tani nuk e shoh”, u shpreh deputeti socialist.
Kritika ai adresoi edhe ndaj Petrit Malaj, për të cilin tha se nuk e sheh të angazhuar me problematikat e zonës.
Braçe foli edhe për çështjen e sigurisë ushqimore, duke mbrojtur fermerët shqiptarë nga përgjithësimet negative.
Sipas tij, problemet nuk burojnë nga prodhimi bujqësor, por nga mënyra e trajtimit të ushqimit, ndërsa paralajmëroi se stigmatizimi i fermerëve është i padrejtë.
Ndërkohë, deputeti socialist ka publikuar edhe dy video në rrjetet sociale, ku në njërën shfaqet Edi Rama gjatë kohës kur ishte kryetar i Bashkisë së Tiranës, duke prerë me sopatë një shtyllë elektrike.
Në videon tjetër, Braçe denoncon gjendjen e një rruge të pambaruar në zonën e Selitës, duke akuzuar institucionet për zvarritje dhe mungesë koordinimi.
“23 vite kthim pas tek sopata, ndryshe punët nuk bëhen dhe njerëzit vuajnë budallallëkun e të njëjtave institucione”, shkroi ai në rrjetet sociale.
Deklaratat e Braçes po interpretohen si sinjal i tensioneve të brendshme në Partinë Socialiste, veçanërisht ndaj rolit në rritje të Belinda Balluku në strukturat politike dhe ekzekutive të mazhorancës.
