Ish-sulmuesi i njohur i Kombëtares, Altin Rraklli, e sheh suksesin historik të kuqezinjve në kualifikueset e Botërorit si një dëshmi të forcës së grupit dhe punës së trajnerit Silvinjo. Në një intervistë ekskluzive për “Panorama Sport”, ai shprehet se Shqipëria jo vetëm që meriton vendin në “Play Off”, por ka potencialin të shkojë deri në fund – në Kupën e Botës 2026.
“Vendi i dytë ishte i merituar – Serbia nuk ishte më e fortë se ne”
Rraklli analizon me detaje ecurinë e kuqezinjve dhe thotë se objektivi i dytë në grup ka qenë plotësisht i arritshëm:
“Ne e dinim që Anglia ishte e pakonkurrueshme për vendin e parë. Lufta ishte për vendin e dytë dhe Shqipëria e meritoi plotësisht. Në të dyja ndeshjet direkte treguam se ishim më lart se Serbia. Ndërkohë, ata kishin një trajner me shumë emër, por që nuk më bindte dhe nuk krijonte ekuilibër në ekip.”
Ai thekson se Shqipëria kishte maturi, vazhdimësi dhe besim, duke shmangur gabimet që shpesh i kanë kushtuar në të kaluarën.
“Gabimet ishin minimale – grupi luajti si i barabartë me ekipet e mëdha”
I kënaqur me mënyrën se si skuadra menaxhoi presionin, Rraklli thekson se kuqezinjtë u treguan profesionistë:
“Përveç një gabimi në Letoni, kemi bërë gjithçka që mund të bëhej. Morëm maksimumin kudo dhe treguam personalitet. Kjo Kombëtare sot nuk trembet, luan ndryshe, me ritëm dhe identitet.”
Rraklli besimplotë: “Shkojmë në Botëror”
Legjenda e sulmit kuqezi është optimist për rrugëtimin që na pret:
“Kemi shansin më të madh historik. Po e përsëris: Shqipëria mund ta arrijë Botërorin. Grupi është i pjekur, djemtë janë rritur, dhe mentaliteti fitues ndihet që nga minuta e parë.”
Silvinjo? “E ka merituar rinovimin pa asnjë diskutim”
Rraklli është i qartë: trajneri brazilian është njeriu i duhur.
“Silvinjo na çoi në Europian dhe tani në ‘Play Off’ të Botërorit. Statistikat flasin. Ai ka ndërtuar një skuadër, harmoni dhe stil loje. UEFA Nations League nuk duhet marrë si matës. Ajo është një zëvendësuese e miqësoreve.”
Sipas tij, vazhdimësia është çelësi i suksesit:
“Silvinjo duhet të rinovojë, e ka fituar vetë kontratën. Nuk ka asnjë arsye të kërkojmë trajner tjetër.”
Në përfundim, Altin Rraklli i dërgon një mesazh të qartë tifozëve dhe Federatës: Shqipëria është në rrugën e duhur, skuadra është e uritur dhe Botërori 2026 nuk është ëndërr – është objektiv i prekshëm.
