Kryeministri Edi Rama ka deklaruar se Shqipëria nuk ka një nivel më të lartë korrupsioni se vendet e tjera europiane, duke kundërshtuar perceptimet negative që, sipas tij, bazohen në stereotipe të vjetra.
Gjatë fjalës së mbajtur në aktivitetin “MatchMaker Albania”, Rama u shpreh se Shqipëria shpesh paragjykohet për korrupsion dhe krim të organizuar, por sipas tij, realiteti është ndryshe dhe kjo reflektohet në zhvillimet ekonomike të viteve të fundit.
Ai theksoi se rritja e investimeve të huaja dhe zhvillimi i turizmit janë tregues konkretë të përmirësimit të klimës ekonomike. Sipas tij, vendi ka arritur të tërheqë rreth 1.6 miliardë euro investime në vit vetëm në sektorin e turizmit, ndërsa numri i turistëve ka arritur në rreth 12 milionë.
Rama argumentoi se këto shifra nuk përputhen me idenë e një vendi të dominuar nga korrupsioni, duke shtuar se Shqipëria po kalon nga një ekonomi sezonale drejt një modeli më të qëndrueshëm dhe të diversifikuar.
Në fjalën e tij, kryeministri vuri në dukje edhe objektivat strategjikë të qeverisë, përfshirë rritjen e eksporteve në 1 miliard euro dhe arritjen e sovranitetit energjetik deri në fund të dekadës, përmes investimeve në diversifikim dhe inovacion.
Ai përmendi gjithashtu zhvillimin e ekonomisë digjitale dhe përpjekjet për modernizimin e sektorëve si bujqësia dhe energjia, duke i cilësuar si shtylla kryesore të rritjes së ardhshme.
Në përfundim, Rama theksoi se qeveria synon të përmirësojë më tej standardet dhe të reduktojë çdo rast korrupsioni, ndërsa u bëri thirrje kritikëve ndërkombëtarë që të shohin realitetin në terren përpara se të japin gjykime për Shqipërinë.
